فى سبت بعدو الحد
فى حد ما بعدوش
فى حد لما احتد
الكل ما احتدوش
مع انهم فى العد
ياما ميتعدوش
لكن فى وقت الجد
دارو الوشوش مابانوش
منهم فى ناس ع الأد
راضيين بكام ملطوش
وناس ماليهم حد
بالظلم يملو كروش
و ناس تحب الهد
والباقى مبيبنوش
وناس املها اتهد
وناس ميتهدوش
وشاب زى الورد
فى قتله ماتوصوش
وناس بتملا اليد
ياخدو ومبيدوش
وناس بضيق اليد
نامو وما اتعشوش
وناس تموت م البرد
وناس مبيحسوش
وناس بتوعد وعد
وسنين منفذوهوش
ولا شئ حصل ولا جد
عايشين ومتحاسبوش
وناس تمد اليد
غلابة وملقيوش
وناس تبيع الورد
علشان يلمو قروش
اخر النهار تتشد
ويروحو ف الكلابوش
وناس يقيمو الحد
والدين ميفهمهوش
وناس تعيش فى المجد
وهما ما استحيوش
وناس بتبنى ف سد
وناس مايهتموش
علشان بيبنو فى سد
عن ناس تعوزنا يحوش
من تحته غاز يتمد
لناس مايستهلوش
